BAILES DE SERÁN
🥁 ANDRÉ ADRIO
Os luns de 17:00 a 18:00
Os mércores de 17:00 a 18:00
25€ AO MES
DESCRICIÓN:
O Baile popular no tempo lúdico na Galiza.
Ao longo deste obradoiro aprenderemos as formas básicas de bailar e gozar da nosa música popular, así como asdiferentes formas de comunicación, tanto pasadas como presentes. Abordaremos tamén a evolución presente dos eventos lúdicos populares, adaptando aos tempos dende o coñecemento as formas que neles existen. A través de xogos e buscando a horizontalidade, aprenderemos a desfrutar, pasalo ben e expresarnos no noso baile, mellorando a confianza así como a autopercepción de nós mesmas e do grupo. Partindo dunha base lúdica, exploraremos todas xuntas a forma de resolver diferentes situacións, así como a construción e a creación de pasos e movementos propios. Buscaremos a forma de expresarnos dentro do baile, descubrindo a capacidade creativa que ten o baile popular.
ANDRÉ ADRIO:
Vencellado ao baile tradicional galego dende moi pequeno e con formación noutros estilos de danza como a contemporánea, a clásica e o flamenco, así como en diferentes maneiras de comunicación a través do movemento, formando parte de múltiples cursos de danza e teatro impartidos por profesionais recoñecidas en cada sector. A actividade física sempre formou parte na súa vida, de aí a súa licenciatura en Ciencias da actividade física e do deporte en 2012 pola Universidade de Vigo.
Como bailarín, foi galardoado en varias ocasións, destacando o premio especial Vigo Porté (con «Flamenkeando») e o premio Vai de Baile, organizado polo programa Luar da Televisión de Galicia. Dende 2013 enfoca súa carreira profesional á docencia, impartindo principalmente danza tradicional en numerosas asociacións de Vigo e comarca.
Actualmente, continúa descubrindo novas formas de expresión corporal e o seu máximo interese está na busca de novas fórmulas para a transmisión dun legado fundamental na Galiza. Nas súas propias palabras: «o meu traballo céntrase en facer que o baile popular galego sexa fácil e atractivo para tódalas persoas».